María Helen Eiðsdóttir

long time no see......

2003-11-25T11:35:00.000Z

Jæja nú er ég aftur farin að gefa mér tíma til að gera annað heldur en að liggja yfir verkefnum. Alveg er ég komin með ógeð fyrir verkefnaskilum. Ég er búin að vera að læra til þrjú á nóttunni síðustu viku til að ná að klára allt sem ég hef þuft að skila. Svona er þetta nú. Dóttir mín er komin með nett ógeð af lærdómi mömmu sinnar. En nú fer þessu að ljúka. Ég reyndar tók mér smá frí frá lærdóminum á laugardaginn því að við vinkonurnar vorum að gæsa vinkonu okkar og fórum í magadans og alles, nú er maður orðin helv... flottur að dansa. Það var mjög skemmtilegt en aldrei hefði mig grunað að þetta væri svona erfitt. Maður fann fyrir vöðvum sem maður vissi ekki einu sinni að voru til..... En þetta var mjög skemmtilegur dagur. Jæja nú þarf ég að fara í tíma og vona að ég verði dugleg að skrifa næstu daga þar sem er farið að róast aðeins hjá mér.

yfirlit

2003-11-14T09:13:00.000Z

Jæja þá er þessi vika komin að enda. Hrikalegt hvað tíminn er fjótur að líða. Það eru bara tvær vikur eftir að skólanum en samt sem áður nóg að gera. Í tímanum á miðvikudaginn þá vorum við að vinna að skólaheimsókninni og það var ágætt. En það er frekar erfitt að vinna fimm að einu tölvuverkefni, einn að pikka og hinir að vinna að einhverju öðru. Þetta tókst nú ágætlega hjá okkur held ég.
Ég held að mér gangi nú ágætlega með þau verkefni sem eftir eru og ég byrjuð að kíkja á, en ég verð nú að segja að ég hlakka alveg til að komast í smá frí, mér finnst þessi önn vera miklu erfiðari heldur en í fyrra. Ég er alveg að verða svolítið þreytt á að eiga ekki líf...... get ekki alveg sagt að ég geti horft á sjónvarp eða neitt. Þegar það var verið að tala um einhverja sjónvarpsþætti um daginn þá vissi ég ekki einu sinni að það væri verið að sýna þá???? Já svona er þetta nú, en þetta er að verða búið.....

Svolítið fyndið!!!!

2003-11-11T11:37:00.000Z

Jæja hann er nú alveg ágætur enn sem komið er. Reyndar eru einhver leiðindi í einu námskeiðinu sem ég er núna og það er voðalega leiðinlegt. En það leysist nú vonandi sem fyrst. En ég verð að segja frá einu sem mér finnst mjög fyndið, ég var að ræða við dóttur mína í gær sem er þriggja og hálfs. Hún var að segja mér að hún hefði verið í leik í gær og að ein stelpan á deildinni hennar var hvolpa mamma, ég spurði hana hvort að hún væri mamma lítilla hvolpa. Nei, svaraði hún, hún væri hvolpur og ætti lítil börn. Þá fór ég að útskýra fyrir henni að hvolpar gætu ekki átt litla hvolpa, heldur yrðu þeir fyrst að verða stórir og þá gætu þeir átt litla hvolpa. Bara eins og börn gætu ekki átt lítil börn, bara mömmur. Ok, hún samþykkti það nú alveg, eins og ég væri mamma hennar af því að ég væri stór og að ég ætti hana. Þá spurði hún mig hvort að það héti þá hundamömmur, já ég sagði að það væri nú hægt að segja svoleiðis, en að hundamömmur héti tík og að hundapabbar hétu hundar. OK..... tík og hundar. Eftir stuttan tíma spurði hún: "Mamma ert þú tík?"........ Ég náttúrulega gat ekki annað en hlegið að þessu og neitaði sem ég tel vera rétt. En sagði bara að hundamömmur væru tíkur, ekki "barnamömmur".... já það er nú ekki öll vitleysan eins.

2003-11-08T11:11:00.000Z

Jæja ég hef ekki bloggað í rétt rúma viku.... þetta er alveg hræðilegt. Reyndar er vikan búin að vera mjög bisý hjá mér. Ég er alveg að fá nóg af þessum blessaða skóla núna, orðin svolítið þreytt á því að vera að læra fram yfir miðnætti og að vera að þvo allt þegar dóttur minni VANTAR föt og svoleiðis. Þetta er allt í lagi í smá tíma en nú er þetta orðið alveg ágætt. Reyndar skrópaði ég í bekkjarpartý í gær, (á nú örugglega eftir að heyra það) en ég barasta gat ekki komið mér af stað. Líka var Hlynur heima og við höfum ekki verið heima bæði í ég veit ekki hvað langan tíma, þannig að ég bara hafði mig ekki af stað. Svo er nú líka hörkudjamm í kvöld, frúin er nú bara að fara á grunnskólareunion, þvílík stemning og stuð. Ég held að það verði mjög skemmtilegt að hitta allt þetta lið eftir langan tíma. En ég segi nú frá því síðar. Ég, Vilborg og Kata kláruðum stærðfræði verkefnið í gær og skiluðum þannig að það er einu verkefninu færra, mér til mikillar gleði. En jæja ég ætla að fara að hitta reunion skipulagspæjurnar og gera fínt fyrir kvöldið...... stuðkveðjur úr Breiðholtinu!!!!

Geðveiki

2003-10-31T14:52:00.000Z

Jæja þá er þessi vika loks á enda. Ég er búin að vera að læra eins og geðsjúklingur. Var að læra til klukkan tvö í nótt og er búin að sitja í allan dag en held að ég hafi verið að klára. Þvílikur lúxus, enda sé bara helgina fyrir mér í hyllingum. Svo á líka dóttir mín inni mikin tíma hjá mér, þar sem henni hefur liggur við verið hent fyrir framan sjónvarpið á hverjum degi því að mamma þarf að læra. Enda hún er orðin svo pirruð á mér að það er orðið þvílíkt vesen að fara frá henni á morgnanna á leikskólanum. En nú er þetta allt að lagast, ég er búin að lofa henni að hún hafi mig alveg út af fyrir sig um helgina, enda Hlynur að vinna. Ég var búin að lofa henni að gera heimabakaða pizzu í kvöld og að við myndum hafa kósý kvöld í kvöld. Ég ætla síðan að fara bara að sofa með henni því að ég er að deyja úr þreytu zzzzzzzzzzz.......... Jæja ég ætla að drífa mig heim og sækja prinsessuna því að ég er komin með ógeð af exel og línuritum og svoleiðis, en þetta er nú samt svolítið flott. Kikkaðu hér til að sjá verkefnin sem ég er búin að vera að gera síðasta sólarhring. Er faaarrrriiiinnnn.......

Nóg að gera

2003-10-28T21:57:00.000Z

Það er meira en nóg að gera hjá mér þessa vikuna. Í þessum skrifuðu orðum ætti ég að vera að læra undir próf en ákvað að taka mér smá pásu til að tékka á reunioninu sem ég ásamt fjórum öðrum erum að plana. Þetta er grunnskóla reunion og þvílík stemmning fyrir þessu.... jú jú það eru komin tíu ár síðan ég útskrifaðist úr grunnskóla. Við erum búnar að setja upp heimasíðu og endileg allir kíkja og skoða með því að klikka hér. Ég alla vega hlakka ýkt til, að hitta allt þetta lið sem maður átti ágætis tíu ár með. Jæja ég ætla að halda áfram að læra........ :(

Yndisleg helgi

2003-10-26T20:19:00.000Z

Ég fór í sumarbústað um helgina með Hlyn, Elfu Dís, Ingu Birnu og Helga. Það var alveg æðislegt, við spiluðum, átum, lásum, sváfum og svoleiðis. Þvílík afslöppun og þægindi, mjög gott að komast aðeins í smá frí frá lærdómi og heimilisstörfum. Við spiluðum matador, sem ég veit ekki hversu oft ég spilaði sem krakki, djö... er þetta skemmtilegt spil. Nema kannski að ég átti dýrustu götuna og var með þrjú hús á henni og svoleiðis... gekk bara ágætlega þegar allt í einu fór allt að snúast mér í óhag og ég varð gjaldþrota og var vísað úr spilinu. Þvílíkt svekkelsi.... en svona er þetta nú bara.

Loksins komin í lag

2003-10-22T15:35:00.000Z

Jæja þá er gamla heimasíðan mín komin í lag, loksins.... mér til mikillar gleði. Þannig að nú er hægt að sjá starfsferilskrána mína sem var niðri og ég átti að vera löngu búin að skila. Í tímanum í dag hjá Salvöru þá klipptum við saman videoið okkar og glærurnar, settum inn myndir og svoleiðis, agalega sniðugt. Nú er bara að vinda sér í myndaalbúmið á fullu og þá get ég skilað því líka. Nú ætla ég að halda áfram að lesa í stærðfræði svo að ég verði ekki alveg úti að aka á morgun í verkefnavinnunni.

Þvílíkt rugl

2003-10-21T21:43:00.000Z

Nú er komin vika síðan ég bloggaði, tölvan heima fékk einhvern ansk.... vírus í sig og það varð allt stopp. Hafið þið einhverntímann hugsað út í það hvernig lífið var áður en maður var með tölvu og hvernig fólk gat lifað án GSM símans, þetta eru svo hrikalegir nauðsynjahlutir í dag, að maður verður bara hand- og fótalaus liggur við ef maður hefur ekki þessa hluti við hendina og eða að þeir séu ekki alveg í lagi. Pæliði líka í því þegar húsmæður í dag segja að þær skilji ekki alveg hvernig mamma þeirra fór af hérna í gamla daga, þegar hagkaup (sem var örugglega eina verslunin þá) var bara opinn til klukkan fimm á daginn og aldrei um helgar eða neitt. Nú auðvitað var bara verslað á opnunartíma.... þjóðfélagið er bara orðið þannig að það er búið að stjana svo hrikalega í kringum rassgatið á okkur og þar af leiðandi við (þjóðfélagsþegnar) orðnir svo frekir um að allt eigi að vera opið hvenær sem er og að maður eigi bara að geta fengið einhvern núna.... til að laga hlutina, eða að fá tíma hjá lækni, það átti nú bara að gerast í gær en ekki eftir tvo daga. En svona er þetta, maður er svo fljótur að venjast góðu....
Ég er búin að vera svo tæknileg í dag. Ég, Kata og Björgvin vorum að taka upp á video í skólanum fyrir verkefni í upplýsingatækninni og svo settum við það inn í tölvu og klipptum það aðeins til og svoleiðis.... agalega tæknileg við þrjú.
Annars er bara geðveikt að gera í skólanum hjá mér, sífellt lærandi og skemmtilegheit....
Reyndar skrifaði ég eitthvað agalega skemmtilegt síðasta miðvikudag en það hefur ekki komið inn..... þessi blessaða tækni...

Heimasíðan mín

2003-10-14T20:59:00.000Z

Það er búið að vera nóg að gera hjá mér síðustu daga. Það sem kannski stendur uppúr er að ég fór í 11 ára afmæli hjá honum Guttormi sem er "bæðívei" naut í Fjölskyldu og Húsdýragarðinum..... lalala
En heimasíðan mín er í einhverju fokki og ég var niðri í gagnasmiðju í dag að vesenast með þetta allt saman og enginn veit af hverju hún tók upp á því að fara út af netinu eða eitthvað en þetta er allt í vinnslu skilst mér... vona ég. En ég var búin að gera starfsferilskrána mína á hana, ég reyndar gat sótt hana í gær en ekki í dag.... þetta er samt allt í einhverju veseni og ég skil ekkert hvað er að gerast. En vonandi kemur þetta í lag fljótlega því að ég nenni ekki að standa í svona veseni og rugli. Plús það að ég var að fá frontpage í tölvuna heima og agalega fínt, en það er ekki photo gallery í því þannig að ég get ekki sett neinar myndir heima á netið... þannig að ég er að spá í að sleppa við að gera myndaalbúm og gera bara síðu á ensku í staðinn..... þetta "bévítans" tölvuvesen er að gera mig geðveika.... hver er svo að tala um að tölvur eru lausn á öllu.... megi sá hinn sami vera í mínum sporum núna og redda þessu fyrir mig....

Fyndin frétt

2003-10-10T08:29:00.000Z

Jæja nú er frúin mætt í skólann og klukkan er bara átta...... þvílík hetja. En á leiðinni í skólann í morgun heyrði ég fétt að í Chile er víst bannað að skilja (hjónaskilnaður), þar er mikið að kaþólksu fólki. En nú vilja yfirvöld fara að breyta þessu og eru að reyna að finna leið til að setja það inn í lög að það megi skilja, kirkjan er alfarið á móti þessu.... nema hvað að þeir þarna í Chile voru ræða um það að hafa möguleika þegar fólk væri að fara að gifta sig gæti það hakað í reit, þegar þau væru að fylla út umsókn, um að það hæfi möguleika um að skilja.... En skemmtilegt þegar maður er með makanaum sínum og er að fara að gifta sig þá spyr presturinn hvort maður vilji hafa möguleika á að skilja...... hvað á maður að segja....
Ja hérna þetta lið þarna úti í þessum stóra heimi.... ekki alveg í lagi.

Skólinn og lífið í dag

2003-10-08T15:04:00.000Z

Jæja nú er ég í tíma hjá henni Salvöru í upplýsingatækninni. Þetta er nú allt að koma heim og saman hjá mér..... Ég er nú búin að fá mér ADSL en er bara að bíða eftir að það fari í gang sem verður nú á næstu dögum. Svo er ég að fá Frontpage heim þannig að ég get farið að vinna í öllu þessu saman heima og þá fyrst fara hlutirnir að gerast. Það er ferlega leiðinlegt að vera háður því að vinna alltaf hérna niðrí skóla.... ekki það að aðstaðan er mjög góð. En ég nenni hreinlega ekki sagt að vera hérna til kl 18.00 alla daga, plús það að ég er með það mottó í gegnum skólagönguna mína að reyna að læra ekki milli kl 16.00 og 20.00 því að þann tíma vill ég eyða með yndislegu dóttur minni..... En á kvöldin er ég alveg til í að fara útí eitthvað sniðugt í tölvunni en þá er skólinn lokaður.... þannig nú fer allt að gerast hjá pæjunni.

Einnig í dag vorum við að skrá okku öll inn á spjallrásar kerfi, agalega sniðugt.... til að kíkja á það smelltu hér.
Jæja ætla að halda áfram að vinna.....

Persónulegur vefur

2003-10-04T17:32:00.000Z

Ég ætla að bæta við persónulegum vef á heimasíðuna mína í upplýsingatækninni. Á vefnum mínum ætla ég að hafa myndaalbúm og svo ætla ég að gera starfsferilskrá. Ég held að það verði svolítið skemmtilegt að rifja upp hvað maður hefur gert í lífinu.

Brjálað að gera

2003-10-04T17:28:00.000Z

Jæja ég hef nú ekkert bloggað í nokkra daga... enda er búið að vera geðveikt að gera hjá mér. Ég á ekkert líf þessa dagana, ég fer í skólann á morgnanna og kem heim og læri, borða, læri (ég hef nú reyndar ekki borðað læri síðustu daga), kyssi dóttur mína góða nótt, læri.... þetta er búið að vera geðveikt. En nú er reyndar aðeins að minnka hjá mér. Það eru búnar 5 vikur af skólanum og ég er að kafna. En hvað um það, ég er að verða búin með vefleiðangurinn hjá mér. Ég ætlaði fyrst að taka fiskvinnslu eða eitthvað tengt fiski þar við erum nú fiskiþjóð.... en svo fann ég ekkert spennandi og var ekki heldur það spennt fyrir þessu að ég nennti að leggjast í það. En svo ákvað ég að gera vefleiðangur um mjólkuróþol þar sem það hrjáir mig, ekki mér til mikillar gleði. Maður verður margs vísari eftir að hafa farið í gegnum leiðangurinn. En ekki svo sem eitthvað sem ég vissi ekki en hinn almenni maður.

Klikkað fólk

2003-09-30T16:29:00.000Z

Ég var að skoða mbl og rakst á þessa furðulega frétt ..........hvað er að fólki? Stundum trúir maður því ekki að það sé til svona klikkað lið maður. Þið verðið endilega að lesa þessa frétt....

Helgin mín

2003-09-28T14:14:00.000Z

Jæja ég gerði svo sem ekkert merkilegt um helgina.... við mæðgurnar horfðum auðvitað á Simpsons með tilheyrandi á föstudaginn. Síðan kíktum við niður í vinnu til Hlyns og fórum með til hans heitan nacosrétt fyrir strákana. Síðan horfðum við á Djúpu laugina þar sem við þekktum tvo af strákunum sem voru að keppast um dömuna. Síðan var ég að hjálpa tengarforeldrum mínum að flytja á laugardeginum, voðalega gaman. Svo á dóttir hennar Hildar hún Tinna Rut afmæli í dag og við mæðgurnar erum að fara í veislu.

En það er nú eitt sem ég skemmti mér mjög vel yfir um helgina. Vinkona Sigurrósar systur minnar er bloggari og hún var að segja helvíti skemmtilega sögu á blogginu sínu um borgarstjórann hann Þórólf. Þið verðið endilega að lesa hana, klikkið hér til að lesa. Hún er síðan 25. sept.

Tæknisagan mín

2003-09-26T17:18:00.000Z

1993 Það fyrsta sem ég man eftir að hafa unnið í tölvu var í Seljaskóla, grunnskólanum mínum í 10. bekk, eða árið 1993. Reyndar fékk mamma mín lánaða tölvu þetta ár þar sem hún var að ljúka námi og fékk lánað fyrir lokaritgerðina sína. Ég fékk nú eitthvað að fikta í henni þá en ekki mikið minnir mig.

1994 Síðan þegar ég byrjaði í F.B. þá fór ég í tölvuáfanga þar sem kennt var á Dos kerfið og lærði það ágætlega þó svo að ég muni ekkert eftir því núna. Þar lærði ég líka fingrasetninguna og hefur hún komið mér að góðum notum síðan þá.

1995 - ´98 Ég tók nú reyndar bara þennan eina tölvuáfanga í F.B. en notaði tölvu heilmikið í skólanum og notaði mikið tölvuverið því að við áttum ekki tölvu fyrst. Síðan var keypt tölva á heimilið 1995 og þá fór ég að fikra mig mikið áfram. Haustið ´98 fékk ég fyrsta GSM síma fyst, reyndar hafði kærastinn minn verið með síma í rúmt ár og ég man þegar hann keypti hann í byrjun árs ´97 fannst öllum hann þvílíkt merkilegur með sig af því að hann fékk sér síma, og sjáið hvernig símamenningin er í dag.

1999 - 2000 Síðan haustið 1999 þá fannst mér tölvurnar hafa breyst svo mikið og ég ekki fylgt eftir þar sem ég fór í nám sem viðkom tölvum ekkert. Þannig að ég dreif mig í kvöldskólann í F.B. og tók einn tölvuáfanga kasólétt. Þegar ég fór svo í barneignarfrí þá reyndi ég hvað ég gat að komast í tölvu og leika mér og skoða þar sem ég átti ekki tölvu sjálf heima.

2001 Þá fór ég að vinna í banka og þar lærði ég heilmikið um tölvur og tölvuforrit og fór á einhver námskeið á vegum bankans og svoleiðis. Ég keypti mér tölvu sjálf þá á mitt heimili og hefur hún verið notuð óspart.

2002 - 2003 Um haustið byrjaði í Kennó og þá fór maður að nota tölvurnar eins og ég veit ekki hvað. Þær eru að mínu mati í dag alveg jafn nauðsynlegar eins og að eiga sjónvarp og síma. Ég gæti alla vega ekki hugsað mér að vera án þeirra.

Annars er það svo sem margt sem ég man eftir, t.d. þegar við fengum fysta videoið okkar þegar ég var 6 eða 7 ára og krakkarnir í götunni öfunduðu mig þvílíkt. Ég man líka eftir því þegar það var ekkert sjónvarp á fimmtudögum :) já tímarnir hafa sko breyst. Svo er eflaust fleira sem ég man eftir en kannski ekki ákúrat í augnablikinu.

Ég ætla að gera tæknisöguna mína aðeins ýtarlegri á heimasíðunni minni, en ekki strax, ekki fyrr en ég fæ frontpage heim og adsl.... sem er allt í vinnslu núna.

Upplýsingatækni tíminn í dag

2003-09-24T14:59:00.000Z

Jæja í dag er ég í upplýsingatækninni og það er barasta búið að vera ágætt. Við erum búin að vinna með heimasíðuna og ég er búin að læra heilmikið. Þetta er allt saman að verða bara ágætt hjá mér held ég ef þig langar til að kíkja á hana klikkaðu þá hér. En nú ætla ég að halda áfram með vinnuna.....

Bílastæðin í KHÍ

2003-09-23T17:16:00.000Z

Jæja ég ætlaði nú að blogga fyrr í dag þegar ég var í gati í skólanum en viti menn vegna víðtæks rafmagnsleysis í Svíþjóð og Danmörku var netsambans RHnets til útlanda niðri gat ég ekki bloggað. En nú er ég komin aftur. Það sem mér liggur mér á hjarta þessa dagana eða bara það sem ég er að pirra mig á eru bílastæðavandræðin við KHÍ..... Hvernig dettur yfirstjórninni eða framkvæmarstjórninni eða hvað sem það nú er í KHÍ að láta gera þetta að hausti til. Af hverju í anskotanum gerðu þeir þetta ekki í sumar þegar allir voru í sumarfríi. Nú er maður korter á hverjum morgni að finna sér bílastæði og þó svo að maður sé komin hérna klukkan tíu mínútur yfir átta þá eru öll stæðin í kring full. Þetta er alveg til að byrja daginn ömurlega og verða pirraður. Það hefði átt að vera búið að þessu þegar við mættum í skólann 1.sept. Takk fyrir

Helgin

2003-09-22T21:31:00.000Z

Jæja ég ætlaði nú að vera ýkt dugleg í gær og skrifa í bloggerinn minn en viti menn að ég gat ekki opnað síðuna. Ég gat opnað allar aðrar síður en ekki þessa. Það hlýtur eitthvað hafa verið að. En hvað um það, ég átti alveg ágætis helgi. Við mæðgurnar bökuðum okkur pizzu á föstudaginn og ætluðum að horfa á Simpsons sem Elfa Dís bíður eftir alla vikuna en þegar ég kom fram í stofu þar sem hún beið þá var hún steinsofnuð og ég var svo miður mín fyrir hennar hönd að ég var næstum því búin að vekja hana. En svo ákváðum við fjölskyldan að vera heima í leti á laugardaginn vegna veðurs (eða þannig). Reyndar fórum við aðeins út því að við þurftum að kaupa flísbuxur hana prinsessunni. Þannig að við kíktum í 66°N og keyptum buxur handa henni. Síðan fórum við Sigurrós aðeins í Smáralindina til að kaupa afmælisgjöf handa Maríu Rún litlu því að hún er að fara að halda upp á tveggja ára afmælið sitt á sunnudaginn. Síðan á sunnudaginn fórum við í Þjóðleikhúsið að sjá Dýrin í Hálsaskógi og það er æðislegt.... í einu orði sagt, ég skemmti mér konunglega þó svo að ég hafi verið að fara með dóttur mína. Ég hvet alla til að fara og sjá þetta því að þetta ævintýri þekkja allir og hafa gaman að. Svo fannst mér líka rosalega gott að sumir brandararnir í leikritinu eru fyrir fullorðna fólkið eða eitthvað sem börnin skilja ekki. Þannig endilega farið og sjáið þetta...... Svo eru krakkar sem leika sum hlutverkin og þau voru frábær, stóðu sig svo vel. Þvílíkar hetjur, mér finnst Þjóðleikhúið eiga gott hrós fyrir vel unnið verk.
Síðan fórum við í afmælið og lágum í leti í gærkvöldi.

Helgin framundan

2003-09-19T14:32:00.000Z

Annars á ég von á ágætis helgi framundan... Við mæðgurnar erum bara tvær heima í kvöld og Elfa Dís heimtaði að fá heimabakaða pizzu sem við eigum að borða fyrir framan Simpsons, þar sem allt er látið eftir barninu!!! þá verður þetta gert. Elfa Dís fer náttúrulega á dansnámskeið í fyrramálið og svo þurfum við að fara að kaupa handa henni flísbuxur fyrir veturinn. Síðan held ég að við taki lærdómur. Svo á sunnudaginn þá förum við fjölskyldan og Sigurrós systir að sjá Dýrin í Hálsaskógi, sem verður mjög spennandi því að ég man eftir því þegar ég fór á þetta sem barn.

Glæruverkefni

2003-09-19T14:28:00.000Z

Ég, Kata og Björgvin ætlum að vinna saman að glæruverkefninu okkar. Við ákváðum að taka fyrir stærðfræði í 5. bekk eða fyrir 10 ára gömul börn. Glæruverkefnið mun miðast við það að við séum að kynna fyrir foreldrum það sem börnin þeirra koma til með að glíma við veturinn. Þar kynnum við markmið, höfum útskýringar á táknum úr bókinni Geisli 1 A og B, hugmyndafræði námsefnisins t.d. ólík nálgun o.s.frv.
Það verður nú örugglega skemmtilegt að prufa þetta verkefni sérstaklega þar sem við þurfum að taka upp á video svo að foreldrarnir geti horft á þetta heima. Síðan er líka bara svo gaman að vera með Kötu og Böbba!!!!!

Vefrallý

2003-09-19T14:22:00.000Z

Jæja þá er ég loksins komin aftur.... ég er bara ekki alveg að muna eftir því að blogga svona reglulega en nú verða gerð skil á því....
Ég er búin með Vefrallýið mitt og viti menn um hvað haldið þið eiginlega að það sé? Jú auðvitað Slökkvilið höfuðborgarsvæðisins. Heimasíðan þeirra er mjög áhugaverð og maður getur lært heilmikið af henni. Ég hvet alla til til að skoða hana og þeir sem vilja geta gert vefrallýið. Því að við ættum öll að vita hvernig að er staðið um eldvarnir og hvernig við eigum að bregðast við í eldum og þess háttar. En hér kemur vefrallýið mitt.

Byrjið á að fara inn á shs.is og þar eru svörin við öllum spurningunum

Hér eru svo spurningarnar

1. Hvað eru stöðvar slökkviliðsins margar og hvar eru þær til húsa?
2. Hvað heitir slökkvilisstjórinn?
3. Hver eru byrjunarlaun 25 ára slökkviliðs- og sjúkraflutninganema?
4. Slökkvilið höfuðborgarsvæðisins hefur margvíslegu þjónustuhlutverki að gegna við
almenning og fyrirtæki á höfuðborgarsvæðinu. Hver eru þau?
5. Hvað kostar að fá skoðun eldvarna í sameignum fjölbýlishúsa?
6. Hvenær á maður að nota léttvatnsslökkvitæki?
7. Hvað eru almennavarnir og hverjir taka þátt í þeim?
8. Hverjir sitja í almannavarnanefnd?
9. Hvers krefst flóttaáætlun?
10. Fystu viðbrögð við eldsvoða skipta sköpum, hver eiga þau að vera?
11. Hvað er eldibrandur?
12. Sérstök forvarnardeild er starfrækt á vegum slökkviliðsins, hver eru markmið
hennar?
13. Hver er heimasíða sjúkraflutningaskólans?
14. Nokkrir slökkviliðsmenn fóru á heimsleika slökkviliðsmanna í Barcelona 2003, einn
þeirra vann gull í bekkpressu í sínum flokki. Hvað heitir hann?
15. Hvert er neyðarnúmer SHS?

Hugmynd að vefrallý

2003-09-10T15:32:00.000Z

Ég skoðaði nokkrar síður sem eru sniðugar til verkefnis fyrir vefrallý. Fyrst fór ég inn á heilsa.is og datt í hug einhverskonar verkefni tengt heilsunni en ætla að skoða meira. Síðan fór ég inn á reykjavík.is og datt í hug einhverskonar verkefni um Reykjavík og hvar maður gæti nálgast hinar ýmsu upplýsingar. En svo datt mér auðvitað SHS í hug, slökkvilið höfuðborgarsvæðisins, þar sem maðurinn minn er slökkviliðsmaður og tengdapabbi minn líka, og ég er nú nokkuð inni í þessu öllu saman og ég er barasta að hugsa um að nota hann fyrir vefrallýið. Þvílíkt sniðugt.... ;) Nú þarf ég bara að leggjast yfir vefinn og búa til spurningar

Leikir á netinu

2003-09-10T14:41:00.000Z

Einnig skoðuðum við leiki á netinu, og það er til fullt af leikjum og endalaust úrval. Ef maður byrjar þá getur maður gleymt sér í tölvunni endalaust, þvílíkur tímaþjófur. En stundum er gott að hafa eitthvað við höndina til að drepa tíma. Ég skoðaði pac-man, sígildur leikur, alltaf skemmtilegur, svo fór ég inn á msn og þar eru fullt af leikjum. Ég held að allir geti fundið eitthvað þar við sitt hæfi. En svo verð ég nú að nefna Barbie fyrir dóttur mína sem er þriggja ára og hún er þvílíkt dugleg að leika sér í tölvunni (þegar mamma leyfir) þar eru fullt af leikjum fyrir litlar stelpur. Ég held að það sé hægt að telja upp endalaust af síðum, en þar sem ég er þvílíkur púslfíkill, eða þegar ég kemst í púsleiki get ég alveg tapað mér (hrikalegt) en mér finnst mér púlsleikir alveg rosalega skemmtilegir og hér getur þú fundið skemmtilegan púslleik.

Dagurinn í dag

2003-09-10T14:06:00.000Z

En þar fyrir utan að hafa pirrað mig á þessu námskeiði þá höfum við verið að skoða hina ýmsu samskiptavefi í dag. Ég kíkti inn á málefni.com , einkamal.is og friendster.com. Mín fyrstu viðbrögð voru bara að ég hló, að sjá þetta fólk sérstaklega á freindster. En eflaust er þetta ágætt fyrir þá sem hafa gaman að þessu. Á þessum þremur vefjum eru ýmis málefni lögð til grundvallar og pælt í hinu og þessu. En mér fannst svolítið skrítið að sumir eru læstir og að maður kemst ekki inn á umræður, allavega gat ég ekki fundið út hvernig ég gæti lesið umræðurnar nema að vera skráð inn. Ég hefði nú haldið að ef maður kæmist inn á krafsandi umræður þá myndi maður nú frekar skrá sig inn og taka þátt í umræðunum. Mér finnst að maður eigi að geta lesið allt sem er skráð en geta bara komið með comment með því að vera skráður inn. En það er nú bara mín skoðun. Ég sökkti mér nú ekkert hrikalega mikið niður í þetta allt saman en Á ÞETTA FÓLK EKKI LÍF?

Allt í bulli

2003-09-10T13:52:00.000Z

Í dag er ég í tíma í upplýsingatækninni og ég er ekki alveg að skilja kennslufyrirkomulagið hérna. Ég sé ekki tilganginn með kennslu þar sem kennarinn stendur og segir "farið inn á þessa heimasíðu og klikkið hér og gerið svo svona þá kemur þetta" o.s.frv. Hvað skilur svona kennsla eftir sig. Ég er alveg viss um að næsta sumar er ég búin að gleyma þessu öllu og get ekki gert helminginn af því sem er verið að kenna hér. Ég fékk nákvæmlega sama kennslufyrirkomulag í haust í upplýsingatækninni og í sumar þegar ég ætlaði að nýta mér það sem hafði lært þá mundi ég ekki neitt og var ekki með neitt í höndunum um hvernig ég ætti að gera þetta. Mér finnst alveg sorglegt að vera að eyða peningum í kennslu sem skilur ekkert eftir sig. Hver er tilgangurinn með því? Hver er tilgangurinn með þessháttar kennslu. Sá sem getur svarað þessu endilega skrifaðu mér svarið! (þarf reyndar að finna út hvernig maður setur comment fyrst)

Lærdómurinn í dag

2003-09-04T17:02:00.000Z

Ég er búin að vera að reyna að leysa þessi blessuðu dæmi í stærðfræðinni.... ég veit ekki alveg hvort ég sé að gera rétt með því að velja stærðfræðina, en það verður bara að koma í ljós. Ég var að hjálpa mömmu með sína stærðfræði og ég er alltaf að komast að því betur og betur að það er eitt að kunna hlutina og annað að reyna að kenna öðrum þá eða útskýra fyrir öðrum, sérstaklega þegar fólk kemur að fjöllum og skilur ekki neitt og maður prufar að nota aðra aðferð til að útskýra... svo finnst manni þetta vera svo auðvelt og skilur ekki að hinn skuli ekki ná þessu. En maður sér það á svipnum á fólki þegar það skilur ekki eða að það skilur. En þetta þarf maður að æfa sig í ef maður ætlar að verða góður kennari, það er ekki nóg að maður kunni hlutina. En þetta er mjög góð æfing fyrir mig að kenna henni. En svona smá upplýsingar en þá er mamma mín sem sagt í fjarnámi hér í kennó og reynar er hún líka í Upplýsingatækni og samfélag og ef þig langar til að skoða bloggið hennar klikkaðu þá hér.

2003-09-03T15:09:00.000Z

Prufa að tengja í annan vef.... það er kennó

María Helen, kynning

2003-09-03T14:53:00.000Z

Ég heiti María Helen Eiðsdóttir og er fædd í Reykjavík 07 júní 1977. Foreldrar mínir heita Elín Guðfinna Thorarensen og Eiður Björnsson. Ég á eina alsystur sem heitir Sigurrós. Pabbi minn giftist svo aftur og heitir konan hans María Magðalena Guðmundsdóttir, ég þrjár hálfsystur föðurmegin sem heita Karitas, Stefanía og Monika. Maðurinn minn heitir Hlynur Höskuldsson og er slökkviliðsmaður hér í Reykjavík hjá SHS. Við eigum eina dóttur sem er mesta prinsessessa í heimi.... alla vega finnst okkur það, hún heitir Elfa Dís og er þriggja og hálfs, ef þig langar til að forvitnast meira um hana þá er hægt að lesa allt um hana á heimasíðunni hennar. Ég er á öðru ári í Kennaraháskóla Íslands, ég valdi mér stærðfræði og upplýsingatækni sem kjörsvið. Eitt námskeiðið sem ég tek heitir Upplýsingatækni og samfélag og ég blogga í því fagi. Ég er stúdent úr F.B. og átti þar ein bestu ár lífs míns. Eftir það fór ég í Iðnskólann og lærði hársnyrtirinn en hætti þegar ég átti eitt ár eftir. Þetta er svona það helsta um mig en það eiga örugglega eftir að koma fram fleiri upplýsingar um mig í blogginu.

Prufa

2003-09-03T14:44:00.000Z

Nú er ég í tíma hér í Kennó og er að prufa bloggið í fyrsta skipti.... gaman gaman